叫爸爸代為問候　王子涵讚金燕玲有中氣

藝人王子涵（Ada）、羅天宇、林師傑、李松蔓、周志康、丁子朗等，全體以運動裝上陣出席跑步活動，雖然天公不造美不停下雨，但無阻他們落場參與3公里賽事的決心。其中王子涵笑指以前都好鍾意做運動，惟人愈大愈懶，都希望今年可以重拾對運動的熱情，問到會驚因落雨而影響表現？她表示都會，加上又好怕凍，都會盡力而為。

提到於無綫劇集《荷里活有個大老千》中飾演她養母的金燕玲，最近於電台節目中自爆有患子宮癌，Ada表示都好擔心對方，得悉消息後都有叫爸爸王晶問候金燕玲：「始終合作過都會有少少關心，拍嗰時佢好精神、好有中氣、又好少嗌攰。」

對有傳她秘撻《荷》的編審李梓樅，Ada以肯定語氣否認，並重申跟對方是好朋友關係：「嗰日做完宣傳就一齊去食嘢。（爸爸知道有過問？）冇呀，如果我有男朋友佢實知，會同佢Update（狀況）。」想交男朋友？她怕醜笑話都想，問到可會叫好友莊思敏介紹對象？她即笑指好友眼角高：「我哋嘅擇偶條件都唔同。」