自爆太Man！雷深如遊日冇人肯同房

藝人雷深如（J.Arie）與游學修為ViuTV節目《Good Night Show發洩擂台》錄影，將於下月與小肥等數名好友到日本旅遊的J.Arie，笑指未出發先使錢，花了近萬元購買機票及酒店：「因為冇人肯同我一間房，頭先問小肥佢未覆，所以我希望今次喺遊戲度搵啲旅費。（全部朋友都唔理你？）可能覺得我太男人啦，再加上全男班。」

而游學修則透露玩遊戲時太投入，不慎刮傷背脊，幸好只是皮外傷。問可有通知女友曾樂彤？他謂：「咁快？啱啱發生咋喎！好少事，費事化大，平時踢波都慣（受傷）啦！」剛完成舞台劇演出的他，表示除了開始為電視劇做後期，亦有意嘗試執導電影：「冇嘢撈嘛！古仔有構思，但一切等寫好劇本再定。」