舊愛陳家樂傳撻陳瀅　余香凝：會祝福佢哋

藝人余香凝出席「第43屆香港國際電影節」開幕禮。問到她可知與舊愛陳家樂同場，她說﹕「唔知喎，不過好似佢係開幕電影嘅嘉賓。（有冇問佢同陳瀅嘅緋聞？）我唔八卦人哋嘅嘢。（等間見到驚尷尬？）其實之前導演會春茗我哋都見過，我有同佢打招呼，佢都有應我。嗰晚我同吳鎮宇、黃秋生同枱，好緊張，隔籬係啲咁重量級嘅演員，我唔敢周圍走，差唔多散席先敢行開同其他人打招呼。（一陣留低睇開幕電影？）唔會，我等陣有嘢做。（如果佢同陳瀅係真，祝福佢哋？）當然啦。（幾時輪到你？）唔諗嘞，呢排忙金像奬，到時我要唱歌，但覺得唱得未夠班，所以好大壓力，每晚兩個鐘就醒一次。」