阿嬌每日食一餐　同老公一齊減肥

藝人鍾欣潼（阿嬌）今晚出席晚宴，明顯見她清減不少，她大呻自上次出活動被指「幸福肥」，的起心肝節食減肥：「自己都覺肥咗，遲啲會做番Gym，我本身嘅食量驚人，依家減到一日一餐。（以前呢？一日七餐？）差唔多！同埋每餐都會食晒，個胃都大咗。（老公見你一日一餐會心痛？）佢都減，但比我食得健康，我好重口味。」

講到好姊妹蔡卓妍（阿Sa）日前自爆準備「雪卵」，阿嬌都憶起之前進行雪卵時，因荷爾蒙失調肥了20磅：「隔日打針抽血好辛苦，每日叫護士嚟屋企打針。（阿Sa都好似話會咁做。）係呀！我見到（報導），係可以要求上門打針，但貴啲。（有咩心得同阿Sa講？）又冇咩，問祖兒（容祖兒）好啲，佢都冇肥到，因人而異睇體質，我雪完都要去做排毒、控制飲食。（阿Sa去雪卵係受你影響？）應該唔係，我都雪咗好耐。」

有份參演以女子監獄為新戲題材的阿嬌，爆笑指拍攝「動作戲」時意外扯甩臨時演員的假髮：「都有啲打鬥戲，唔小心扯甩咗好好笑，因為個臨時演員都唔係戴得好工整，當時我本身係好眼瞓，一見到佢個假髮甩咗就好好笑！下一個Take再扯就好小心，唔可以太大力。」