《阿爺》添食冇咁快　李家鼎呻腦麻痹

藝人李家鼎、譚玉瑛、余德丞、伍樂怡、丁子朗等人到香港國際影視展，出席「Big Big Shop x OK便利店強強聯手發布會」。鼎爺及譚玉瑛齊齊受訪，問到兩人的《阿爺廚房》何時再添食？兩人即謂唔好咁快，譚玉瑛說：「佢要拍劇，我又要拍《香港原味道》，大家都幾忙。」鼎爺亦笑言：「留番公司安排，遲啲先啦，腦麻痹。」但兩人亦謂很多人問他們幾時再拍，譚玉瑛謂之前去到英國及冰島旅行：「竟然都有華人婆婆問我，冇諗過去到咁遠都有人問。（你去玩？）係呀，去咗11日，好開心第一晚就睇到北極光。（同另一半去？）同3個朋友去。」

而問到鼎爺何時都會去旅行？他說：「我啱啱先喺日本拍完黎諾懿個節目返嚟。（係旅遊節目？）總之嗰集我做咗啲同馬、魚有關嘅嘢。（魚係煮嘢食？）鯊魚點煮，我係摸條7尺長嘅鯊魚。（驚唔驚危險？）危險就唔埋去。」