唔係信晒啦嘛？導演認《復仇者4》預告作假

漫威（Marvel）終極話題晒冷作《復仇者聯盟4：終局之戰》（Avengers：Endgame）下月於港台率先上映，其新版預告早幾日熱播，引來全城熱議，不過粉絲估劇情估到興起之際，導演羅素兄弟（Russo Brothers）就開腔反高潮，直認同上集《復仇者聯盟3：無限之戰》（Avengers: Infinity War）一樣，於預告片做咗「手腳」，用假鏡頭作故仔，等觀眾估劇情好似估「食神」諗法一樣，都係估佢唔到呀！

羅素兄弟話而家嘅觀眾輕易就可以於預告片中搵到劇情線索，為咗唔「劇透」太多，保留大家睇戲時嘅驚喜，最後用上《復3》未曝光嘅鏡頭，配埋CG技術，帶出預告片嘅故仔，即係話當中好多鏡頭可能唔會於《復4》出現，喬羅素（Joe Russo）講到用心良苦時表示：「我細個趕11點早場睇《星球大戰：帝國反擊戰》（Star Wars Episode V: The Empire Strikes Back）頭場時，感覺到無比震撼，係因為我對於個故事咩都唔知就入場，我哋希望可以重塑呢種體驗！」相信《復4》上映時唔少網民會於社交網狂爆驚喜！