陳柏宇廣州開騷造勢　粉絲逼爆三層商場

歌手陳柏宇（Jason）日前到廣州宣傳本周六（23日）在當地舉行的演唱會，大批粉絲一早到場霸靚位，逼爆三層商場，場面墟冚。深受歌迷愛戴的他，門票公開發售即被搶晒，他得知門票全數售罄感到驚喜和興奮：「當然好開心，冇諗過咁耐冇去廣州，啲歌迷都仲好支持我，當日見到好多新面孔，其實真係好想有多啲時間同佢哋傾吓偈、交流吓，可惜時間所限。我一定會以最好嘅演出去回饋番畀佢哋，答謝佢哋嘅支持！」