《愛．回家》帶挈！張景淳呂慧儀上廣州吸金

藝人張景淳日前同劇集《愛．回家之開心速遞》嘅演員呂慧儀、周嘉洛及吳偉豪去廣州出席活動，佢話雖然即日來回時間比較趕，但首次去廣州嘅佢，相當興奮：「平時因為要工作，所以都冇乜時間去旅行，所以搭車時我都欣賞吓風景。」

佢又話一班廣州粉絲知道佢哋嚟，一早喺酒店迎接佢哋，感覺好窩心：「平時喺香港有活動，佢哋都會嚟香港支持我哋，今次我哋上去見到佢哋，感覺好Warm，因為對廣州又唔熟，見到熟悉臉孔係分外開心。」景淳話雖然當日因為工作時間唔多，但活動之後都有食美食同影靚相，仲話希望下次有時間可以去嚟過廣州。