勁坎坷！「龍母」艾美莉驚爆24歲曾中風險死

現年32歲嘅英國女星艾美莉克拉克（Emilia Clarke）憑HBO人氣劇《權力遊戲》（Game Of Thrones）「龍母」一角爆紅，劇集拍到第8季即將告別粉絲，艾美莉近日親身撰文驚爆早年完成第1季，初嘗成名滋味時，卻一度中風險死，大步檻過嘅佢驚人剖白，令粉絲大為震驚！

艾美莉於文中自爆早年曾兩度因腦動脈瘤而要接受手術，險死還生，感慨表示：「就喺我兒時夢想成真嘅時候，我幾乎失去生命。我從來冇公開講過，而家係時候喇。」艾美莉表示24歲當年拍完《權》劇第一季，與教練健身時出事，被送往急診室前於洗手間嘔出膽汁，後來接受磁力共振，被發現腦動脈瘤導致危急中風情況－「蛛網膜下腔出血」，三分一患者都會死亡，她最後接受咗3小時微創手術，雖然解決危急情況，但醒來時卻一度講唔出自己個名，更有失語症，令佢一度大失信念：「最差嘅時候，我想放棄，我叫醫護人員畀我死，我嘅工作，我成世嘅（演藝）夢想，就係以言語同溝通為中心，無咗呢啲，我真係唔知點。」幸而後來恢復語言能力，而佢亦多次同自己講唔會玩完，仲試圖保持理性為劇集背對白，醫生後來又話佢知，大腦另一邊仲有一個細少少嘅腦動脈瘤，隨時會爆！

艾美莉表示康復期間仍強忍痛楚為劇集出席記者會，記得感覺隨時會死，全程靠嗎啡捱過，後來死頂拍完第2與第3季劇集，更獲得舞台劇工作，卻於紐約就醫時發現本來細少少嘅腦動脈瘤已經變大一倍，決定再做手術，不過醫生本身話好簡單嘅手術卻突然失敗，最後要再做開腦手術提高其生存機會，留醫多一個月，一度失落到有抑鬱同驚恐症！

艾美莉自言而家個腦好似已經排除咗呢D黑暗時刻，唔係記得好清楚，雖然佢早年被揭病史時曾作出否認，但自言認為現時要分享故事，感覺有幸康復同埋獲得照顧，同時宣布創辦「SameYou」慈善組織，希望憑自身經歷幫到人，組織會為中風同腦受損患者提供幫忙。

艾美莉從小熱愛演藝工作，2011年憑《權》劇上位，近年出演多部大片包括《未來戰士:創世智能》（Terminator：Genisys）、《遇見你之前》（Me Before You）以及《韓索羅：星球大戰外傳》（Han Solo：A Star Wars Story）等。而電影《遇見你之前》講她與不良於行的男主角發展一段動人感情，故事同時探討安樂死議題，相信曾歷生關死劫的她可能倍有感概。