講到做到！黃翠如下廚冧賀蕭正楠42歲牛一
20190323
東網電視
更多新聞短片
好明顯…係愛呀！
藝人黃翠如早前出席活動時，提到今日係老公蕭正楠（阿蕭）42歲生日，佢就已經報咗名上堂學整西餐，雖然佢話擔心連禮物都趕唔切買，不過有心嘅幾時都係時間，到咗今日凌晨，蕭太果然講得出做得到，大晒溫馨落廚合照賀阿蕭！
翠如口硬心軟，佢喺社交網搞笑尊稱老公做「大爺」，不過轉頭又謂以後阿蕭生日，會變成佢太太生日，嗌阿蕭要好好為佢慶祝，不過合照中就見到佢揸起鑊鏟man爆下廚，而阿蕭就變咗「小鳥伊人」喺翠如身後拍手掌鼓勵，看似簡單，但實則真係甜到漏油～
翠如冧爆寫道：「致我大爺，
在你生日的好日子，我仍然停留在煮早餐的程度。
在你生日的前一日，我仍然要你排隊幫我買珍珠奶茶。
在你生日的後一日，我還需要你早上五點車我返工。
我為你感到幸福，因為聽說施比受更為有福。
我還聽說，以後你的生日，也變成你太太的生日。
所以每年3月23日，請好好為我慶祝。
生日快樂?
你大爺上」
而「愛妻號」蕭正楠亦立即留言冧愛妻：「只要是你煮..餐餐食早餐也是幸福，和一班中小學同學仔一齊排隊買珍珠奶茶可以讓我變年輕，早上五時的空氣最好..遊車河一流！我生日你快樂。」呢個閃光彈……贏晒！