拍《降魔的2.0》做女人　張彥博驚大家嘔

藝人張彥博今日上電台分享多年來的音樂路，由細開始講起如何與音樂結緣，又自爆早於6、7歲就識維修結他：「當時喺教堂見到啲結他斷晒，就識如果係木就可以用白膠漿黐。（試過手製一把結他？）未試過，都好想試吓！」

期間見他疲態盡現，一問之下原來剛從加拿大拍畢福音電影回港，還未調整時差：「都成10幾年冇返加拿大，讀書嗰陣去過加拿大做暑期交換生，今次戲入面飾演江美儀同黃智賢（Ben）個仔，去咗9日，當地負十度都好甘，仲不停流鼻血，不過同佢哋合作好開心，佢哋真係當我仔咁照顧，呢個組合就好似《親親我好媽》咁，好搞笑！」續指其中一場拍攝是要跟Ben於街頭Busking，並大爆對方是唱得之人：「佢好唱得！要捉佢唱歌！」

阿博透露日前客串無綫新劇《降魔的2.0》，講起再次扮女人，他大方笑說：「大家鍾意咪扮囉！我不嬲都順應民意、不嬲都百變，最緊要大家開心，都唔怕戴多幾次Bra，係驚大家拎嚟送飯會嘔咋，哈哈！」並指將會前往橫店孖好兄弟張致恒首次合作拍古裝：「暫時都未睇劇本，唔知有幾多對手戲。自己最近用咗4日幫一套卡通片配音，配完好High！」