接受睇AV！泳兒讚明日花綺羅樣靚身材正

歌手泳兒到電台宣傳新歌《明日花》，新歌令人聯想起日本AV女優明日花綺羅，她笑言收到歌詞後，男同事都睇到眼凸凸。泳兒之後特地上網搵資料，大讚明日花綺羅樣靚身材正，又指不覺得睇AV是不見得光的事，並笑言可以增加知識。

問到男友聽到歌名時有咩反應？她笑言：「佢扮唔知，不過有啲男性朋友讚好聽，話以後可以光明正大同人講鍾意『明日花』。」她謂新歌錄了一年，笑言歌名應該叫《明年花》：「其實上年錄好咗，但因為有啲project搞到延遲咗，依家出都啱，因為今年我個project有新idea，啲歌會以花為主題。」

另外，她透露新歌講述一些虛無縹緲的事：「有時啲嘢永遠得唔到係最好，同埋講後悔冇做過嘅嘢。」問她後悔甚麼事？她笑言：「後悔冇學跳舞，如果唔係，依家可以做跳唱歌手，惟有依家將勤補拙。今次首歌嘅MV有跳現代舞，其實我鍾意跳舞，但唔識得表達，細個唔敢同屋企人講，只可以趁媽咪瞓晏覺時，匿喺房偷偷跳舞，但依家就會敢表達想做嘅嘢。」