《22世紀殺人網絡》上映廿周年揭奇洛執三攤

本月31日是為荷里活型男奇洛李維斯（Keanu Reeves）主演科幻代表作《22世紀殺人網絡》（The Matrix）上映20周年，不過粉絲近日就翻出電影本身並非由奇洛擔正的消息，原來監製Lorenzo di Bonaventura早前於訪問中爆料，表示電影公司最初一直未搵到主角「Neo」人選，一度打算搵女性擔正，仲搵奇洛於《生死時速》（Speed）爆紅的女拍檔珊迪娜布洛（Sandra Bullock）上陣，不過最後未成事！

至於Lorenzo亦爆出當時電影公司亦有考慮多位型男包括畢彼特（Brad Pitt）、韋史密夫（Will Smith）以及里奧勒度狄卡比奧（Leonardo DiCaprio），更指畢彼特第一個答應演出，但後來拍完《西藏七年》（Seven Years In Tibet）表示太疲憊而拒演。Lorenzo表示：「我哋之後去搵里奧仔，佢話Okay，我哋齊齊開會，但佢就話演完《鐵達尼號》（Titanic）之後唔可以即時演另一部視覺特效科幻片，最後又走咗，然後到韋史密夫應承，但又辭演。」電影公司最後搵到奇洛上陣，電影於全球大收逾36億港元，叫好叫座封經典科幻動作片！