緬甸探訪喊唔停！陳瀅助養三個小朋友

藝人陳瀅出席《廉政行動2019》首映禮，她透露前一天晚上才由緬甸探訪返港，她說：「我第一次去探訪，去窮啲嘅地方作體驗，今次去探訪小朋友都幾大感觸，之前諗要做啲乜嘢令佢哋開心，但後來發覺佢哋畀我嘅快樂更多。小朋友喺簡單嘅地方，佢哋好小事就可以好開心，我有煮嘢畀佢哋食、同佢哋玩同佢哋一齊相處咗四日，佢哋帶畀我好多經歷。我哋生活喺咁繁忙嘅地方，好小事都會好大壓力，但佢哋每日係面對生存問題，所以我想分享嘅係唔好將自己嘅事睇到有咁大影響。」

陳瀅坦言此行非常感動，喊過不停：「佢哋係孤兒，雖然依家身處嘅地方有人照顧，但我諗到點解佢哋會喺度就覺得好心痛。我今次助養咗三個小朋友，兩男一女，同其中一個好有默契，當佢見到我同另一個小朋友玩嘅時候，佢問我經理人，姐姐係咪唔要我，我聽到好心痛，送別嘅時候大家都好唔捨得，我都抱住佢哋喊。」問到日後會否有意領養小朋友？她稱現在先助養，覺得跟助養的三名小朋友特別投緣。