蘇韻姿領軍　《愛．回家》都有A Cappella

無綫劇集《愛．回家之開心速遞》尋晚播出最新一集，講「熊心如」蘇韻姿（Andrea）、「George」張明偉同埋「朱凌凌」吳偉豪為補習社拍宣傳片招攬學生，當中佢哋係入面唱嘅a cappella（無伴奏合唱），原來係出自Andrea同埋張明偉嘅創作，Andrea說：「首歌係我、吳偉豪、張明偉同埋周嘉洛唱嘅，但拆歌嘅部分就由我同張明偉去負責，分配佢哋點唱。」

Andrea話原本劇本係冇無a cappella呢一部分，係佢自己提議，希望成件事更加完美：「原本導演只係想大家返嚟錄音，清唱一次《摘星》呢首歌就算，但我就衰，我提議整個a cappella，咁難得有呢個機會發揮吓，所以我就同明偉夾吓首歌。（搞成幾耐？）咁啱嗰幾日有工作在身，所以錄音前嗰日仲拆緊歌，雖然我有音樂底子，但冇用好耐所以轉得好慢，所以半夜四點先瞓，第二日又好早返去錄音。（錄咗幾耐？）三個幾鐘，都唔係好耐。」Andrea話最終出到嚟效果好好，自己都開心。