愛女現身撐場　陳柏宇High爆晒親情

藝人陳柏宇（Jason）與師妹黃妍（Cath）出席活動，Jason太太符曉薇更帶同囡囡Abigail到現場探班，「愛女狂魔」Jason說：「平時湊女都身心靈放鬆，我見今日活動時間唔太長，之後又冇工作，可以帶佢哋去行吓街。帶佢出街又方便，佢又唔驚陌生人！」提到六個月大的Abigail已搭過數次飛機，他笑言：「對佢嚟講都冇特別，一開始都擔心佢會扭計，但唔試過唔知，佢都ok！如果佢大個做空姐，爸爸媽媽仲有折扣！」提及Jason早前在廣州演唱會上大騷麒麟臂，稍後的深圳場會否越露越多？他直言：「應該唔會啦，好似內地唔係好可以露太多㗎嘛！」

此外，Jason的女粉絲在演唱會上向男友求婚，藉此問到Cath又喜不喜歡這個求婚方式？她直言：「好大壓力喎！（你會唔會主動求婚？）唔會，我係被動嗰個，好尷尬呀！（恨唔恨嫁？）我又唔係好恨嫁，依家將所有心機放喺工作上面，遲啲先算啦！」她並透露將會到台灣錄製新歌，並由她親自作詞作曲，Jason則笑指自己幾乎每首歌都是寫給女兒。