祖兒孖KB「送大禮」　關智斌嬲豬：我頂

天后容祖兒（Joey）同關智斌（Kenny）向來老友鬼鬼，早前仲孖住去北海道滑雪。但原來旅程途中，Joey專登搵埋好友Kevin Boy（KB）夾埋整蠱Kenny，仲揀正今日4月1日愚人節出po，對Kenny呢位朋友認真「有心」！

片中見佢哋扮到日本酒吧拍節目，體驗做一日調酒師，期間導演同KB已經多次扮鬧交，令現場火藥味甚濃，之後一名KB好友兼假粉絲喺拍攝途中要求合照被阻止，大爆：「明星大晒咩？」令有份做媒嘅工作人員好不滿，跟住假粉絲再強行攝鏡，終令KB為咗維護朋友已大爆發，同工作人員嘈起上嚟，狂爆粗互鬧仲將做和事佬嘅Kenny夾喺中間，搞到Kenny勁驚勁無助，最後佢得知被整蠱後更忍唔住，大爆：「我頂！」、「好賤呀！」相當搞笑。而全程交足戲扮驚嘅Joey，最尾都有攬實Kenny補鑊，仲大讚佢好善良。