緬甸探訪山區兒童　陳瀅助養三個小朋友

藝人陳瀅日前跟慈善機構到緬甸探訪山區孤兒、學童，一連多日的行程，感觸良多，亦獻出她的多個第一次。今次是她首次到緬甸這個地方，出發前，她坦言心情有點忐忑，始終自己長大於香港及加拿大，比較幸福，亦未近距離接觸、體驗過於不幸環境生活及長大的小朋友處境是甚樣。陳瀅受訪時謂：「事前都有調節自己心態，諗吓點樣令佢哋開心，幫助佢哋，但同佢哋相處咗三日之後，我覺得係調轉咗，係佢哋對我嘅感染同啟發係大過我感染佢哋，雖然佢哋冇父母喺身邊，但喺呢個家園（雲彩家園），佢哋好天真、好容易滿足，每日同佢哋玩啲好簡單、基本嘅嘢已經好開心，我返到嚟香港，佢哋令我覺得，好多都巿人嘅問題其實唔係一個大問題，佢哋每日仲諗緊聽日點對抗生活，將來有乜希望，呢啲係佢哋思考嘅問題，所以我好想帶番啲訊息畀身邊朋友，有時我哋嘅問題其實好小事，應該更加關注真正有需要幫助嘅人。」她又表示返港後自己都助養了三個小朋友，因為實在太可愛、太喜歡他們。

始終第一次去緬甸，陳瀅坦言出發前，看到氣溫高達四十度，所以都有點擔心，亦曾猶疑過要否打防疫針，她坦言：「其實每日嘅行程都好緊密，一早起身我哋就去孤兒園，去到夜晚，初時諗過打唔打預防針，但我驚發燒，所以冇打，好好彩今次我冇事，但身邊嘅工作人員就有啲又屙又嘔，可能食物未必太適應，緬甸食嘢係用手食，冇任何餐具，我都係第一次試，佢哋煮飯係用一大塊葉，啲餸放側邊，飯就放中間，然後就先攞飯然後再攞餸，全部用手攞，但係幾好食嘅！」