【娛場】師奶變演員　群姐：開心最緊要

唔知大家記唔記得喺《愛．回家之開心速遞》入面，扮演清潔工嘅「群姐」呢？其實佢真名叫許思敏呀！唔講唔知，原來「群姐」喺1988年入行，佢接受《娛場》主持人李文珊（Sherman）訪問時表示，當時因為要送囝囝去拍教育電視，點知遇上有位媽咪演員甩底，所以助導就問佢有冇興趣頂替佢。「群姐」一聽，就立即答應，因而開啟演員之路。

入咗行之後，「群姐」演過唔少角色，當中包括電影《濟公》張曼玉「媽媽生」、《八仙飯店之人肉叉燒包》被黃秋生殺死嘅受害者、《打擂台》嘅「黑牡丹蘇菲亞羅蘭」等等。直到近年，佢喺《愛．回家》終於遇上一個較有戲份嘅角色，因而令觀眾留下深刻印象！而佢亦都自言好鍾意「群姐」呢個角色：「因為佢唔係好花巧，着上清潔服，紮起頭髮，又唔駛化妝，係一個好隨和嘅角色。」

隨住「群姐」角色愈來愈受歡迎，亦令佢得到唔少街坊嘅愛戴，佢笑言有時去街市，檔主會特意打折畀佢。不過「群姐」亦曾聽過一啲令佢唔開心嘅說話，佢話試過去囝囝畢業禮時，被一名年青人羞辱，囝囝心痛媽咪，即時嬲爆反擊對方。不過「群姐」就認為唔需要還擊：「『曹操都有知心友，關公也有對頭人』，咁你就會睇開咗！」而「群姐」亦話暫時冇乜人生目標，開心係最緊要，只要有「群姐」嘅戲份，佢都會抱住「唔衰得」嘅精神，一直演好佢！

喺戲中，「群姐」經常做一啲媽媽角色，而現實中嘅佢兒孫滿堂，擁有三名兒子、五個孫。呢日，佢就帶咗細仔嘅兩粒乖孫出嚟接受訪問，孫女除咗大爆嫲嫲有好多化妝品之外，仲同嫲嫲合唱《真的愛你》！如果想睇到呢集《娛場》有幾溫馨？咁就一定要去片啦！