處男下海演番自己　何國鉦同羅蘭謝雪心鬥戲

時裝設計師何國鉦（Dorian）獲著名電視劇監製梅小青邀請，為無綫劇集《法證先鋒IV》首次擔任形象顧問，之後竟然加入埋劇組，有份演出。

早前拍攝的婚紗騷戲，Dorian就作出處男演出，劇中做番老本行飾演時裝設計師，他說：「小青搵我做形象顧問時，已經有人誤以為我拍劇，其實嗰時未搵我，係後期真係寫咗個角色畀我，我都以為講笑，直至收到劇本原來係有對白，要同羅蘭姐同心姐（謝雪心）做對手戲，我喺劇入面仲要鬧人，都擔心自己做唔做唔得嚟，好驚拖累大家，拍嗰朝撞到煒哥（陳煒），佢專登嚟打氣，煒話叫我做番自己，但我其實好少鬧人。」

拍攝當日前後錄咗四次，笑言冇諗過鬧人鬧得好順，但拍完冇膽睇playback。他說：「最難忘係有一幕我要拖住羅蘭姐行天橋，原本佢要扮跌倒，我扶住佢，但有一下佢真係click一click，我差啲畀佢扯跌，嗰刻真係好驚，第一驚佢有事、第二驚我有番咁重壓親佢，令佢受傷，咁就過意唔去。」Dorian對客串拍劇感覺良好，與其他演員交流是一件賞心悅目的事。