生日Trip冧到暈　陳茵媺陳豪深情一啜閃爆

藝人陳茵媺（Aimee）星期一（1日）剛過38歲生日，佢就同咗老公陳豪及仔女去咗個生日旅行，日前就着上Deep V泳衣晒湯碗胸，今日佢就再嚟多個冧爆深情錫錫，真係閃爆Mon！

今日Aimee喺社交網上載短片，片中主角當然就係壽星女本人，見佢係咁對鏡頭甜笑，就知成段片大部分都係老公陳豪視角出發，冧到暈嘅Aimee仲喺片中加插同老公同鏡嘅Sweet爆畫面，最吸睛嘅就要數陳豪逆住光向Aimee深情索吻，兩口子好似拍拖仔咁錫錫，真係又溫馨又浪漫，片中又見到Aimee下水禮玩浮潛，成個Trip正到爆裂，連網友睇片都Feel到佢哋幾咁煙韌，上載一個鐘就已經有逾2萬點擊率，雙陳魅力真係冇得輸！