過癮！鄭中基方力申爭住做比卡超

藝人鄭中基（Ronald）和方力申（Alex）為電影《POKÉMON 神探Pikachu》擔任聲演，Ronald和Alex先後在不同電影、電視及配音作品等多次合作，早已默契十足，原來二人亦不約而同地在電影甫推出英文預告時已有留意，Ronald表示：「我自己一直好欣賞Ryan Reynolds，當時睇預告知道佢為Pikachu配音已經覺得好過癮，點知無耐就接到電影公司邀請話想我為香港粵語版配音，巧合得嚟又好似幾好玩，加上我都好耐冇配過卡通，決定挑戰吓。」

而Alex一收到邀請，並得知Ronald亦有份參與，就二話不說答應：「我同Ronald好熟，但有一段時間冇合作過，所以一聽到話佢都會一齊配就好興奮。同埋之前都希望可以接到有適合嘅作品可以同我游水學校嘅小朋友學生一齊睇、一齊分享，時機啱啱好。」