《復仇者聯盟4》美國炒到六萬蚊張飛

漫威（Marvel）超級英雄片大晒冷《復仇者聯盟4：終局之戰》（Avengers: Endgame）周二於美國開放預售，觀眾瘋狂搶飛，癱瘓各大賣票網站，而有成功買票者立即放黃牛飛，到拍賣網站eBay以高價叫賣，最高暫時炒到1萬5,000美元（約11萬7,000港元）兩張飛，即是一張差不多近6萬港元，不過有價無市。業界估計《復4》北美首周末票房將高達2億6,000萬美元（約20億2,800萬港元），不過隱憂是片長超過3小時，令場數減少，影響票房。

香港方面，同樣因為搶飛潮令戲院網站癱瘓！由於購買首映日4月24日早上9時前場次戲飛，會贈送紀念戲飛，大批影迷昨晚已預先到戲院排隊，等候今天開賣。而香港亦有人炒黃牛飛，將原價250港元戲飛炒到500港元。