備戰奧運　歐鎧淳練水怯場致失眠

「女飛魚」歐鎧淳近期極積練水，專心為2020年東京奧運備戰，而佢不時都喺社交網分享操水點滴。雖然佢有多年游水經驗，亦參加過好多公開比賽，但原來訓練有素嘅佢都會有怯場嘅時候。佢呢日喺社交網發文，指自己近日竟然因為要挑戰一個人游晒10乘400米自由泳，而緊張到失眠，佢提到：「最近開始要全靠自己一個游、去面對，冇人喺隔籬，用一個人嘅意志去撐住，諗到呢度就怕自己意志唔夠強頂唔住，其實游過咁多次又有乜好驚，要游到4分40以內咋嘛......但晏晝喺床到癱咗45分鐘，第一次瞓唔到晏覺，原來都係會緊張到瞓唔到。」好彩佢最後都挑戰成功，仲笑言自己喺游嘅過程好似進入咗無人之境，簡直係昇華到另一種境界咁話。