Bob出街冇帶錢　囡囡展現生意頭腦笑爆嘴

藝人林盛斌（Bob）同太太Pearl育有四個小朋友，尋日兩公婆趁放假，加上見天氣咁好，於是分工合作帶小朋友出外遊玩。Pearl帶細仔落樓下公園放電，而Bob就帶三位囡囡去沙灘，不過佢竟然唔記得帶銀包出街…但亮點係佢兩個囡囡嘅幽默回應，真係令人笑爆嘴！

佢留言：「我：『大鑊，冇錢買雪糕同泊車，咁點算？』霏：『你落去問吓有邊個想同你影相，廿蚊一張，咁咪有錢囉！』我：『會唔會貴咗d（啲）呀？』霏：『五蚊囉！』我：『如果冇人想影呢？』霏：『最少都有一兩個嘅！』我：『如果真係一個都冇呢？』霏：『咁咪唔食雪糕囉！』我：『Ok…咁冇八達通泊車又點算好呢？』熹：『好簡單啫，由佢抄牌囉！』霏霏係樂觀嘅，熹熹係霸氣嘅，機機係完全冇參與過討論嘅，細佬係冇去嘅，媽咪係瞓咗嘅！」不過Bob表示話最尾喺車搵到10蚊，同埋真係有人搵佢影相，不過當然冇問人要錢啦！