林文龍為救翠如撞傷頭：擊中佢仲大件事

無綫劇集《致所有愛過的人》今晚筵開11席煞科晚宴，劇中演員林文龍、黃翠如、連詩雅、馬貫東、陳自瑤等齊齊出席。其中林文龍與翠如受訪，表示酒席由所有主演演員跟2位監製夾份找數，他又指對劇終感到不捨，兼自爆《致》是入行以來拍得最攰的劇集。講到早前拍攝一場跑落閘口戲份時，不慎被閘口撞到頭頂而出事，驚見血痕，問到林文龍現時傷勢情況？他大派定心丸說：「好得八八九九。（老婆見到好心痛！）如果中到翠如仲大件事，佢（個頭）會爆咗，甚至頸骨都會有事，個閘係吊住威吔，我撞到個頭都Chok一Chok，我哋做開運動承受個力大啲，女仔就危險。」而目擊者翠如就話幸好得到林文龍保護：「呢場戲試拍咗幾次，突然個閘一跌落嚟大家都反應唔切呆咗！佢撞完喺地下好耐冇郁到，之後起身坐埋一邊再冰敷，見到佢個頭腫晒，大家都好驚！」林文龍續指以為會爆頭，因為傷處即時充血變腫，但堅持拍畢場口先去醫院檢查：「頂到都頂埋佢，唔好第二日再拍，嗰晚做完X光同腦掃描，冇問題都可以走得。」

問到翠如如何報答救命恩人？她稱對方為「龍爺」，林文龍突然大爆翠如是他合作過最有錢的對手：「佢好留意新起嘅樓盤，鍾意就買一間，觀景台對面啲獨立屋。」翠如急忙否認說：「大家估2至3萬一呎，後來睇先知係10萬一呎！」問到最終邊個做業主？二人即有默契地互指對方，相當爆笑！

提到翠如於拍攝期間被傳有B，問到完成拍攝會即刻開Turbo追B？她聞言對林文龍大呻：「嗰日要拍跑戲，佢哋冇人認真理我，你哋同監製都冇錫住我！我跌咗好多次，隻手都瘀晒！」