《愛回家》Terry黑化謀權篡位 網民讚好戲

20190411
東網電視
更多新聞短片
呢個真係Terry?
無綫處境劇《愛.回家之開心速遞》不時引起網民討論,最新嘅一次就係飾演Terry嘅李偉健竟然由善良蠢笨變到奸險聰明,令人難以置信呀!事源Terry接受針灸加電流治療想變醒目時,竟然因為一隻老鼠影響儀器,加大咗針灸電流量,搞到Terry變咗第二個人,從此踏上「黑化」之路!
唔再係純情小綿羊嘅Terry,比家姐「大小姐」(林淑敏飾)更加狠心,大小姐幾唔得人鍾意都有人性嘅一面,相反,「黑化」Terry唔只六親不認設計陷害阿哥Max(鄭世豪飾),最後仲想令對方坐監,為求目的連犯法嘢都想做埋!而以往一直畀家姐指住嚟鬧嘅佢,嚟個大反擊兼引用對方名言兼指住嚟鬧:「呀,你真係蠢唔係扮㗎喎!」仲踢走埋大小姐坐佢office個位謀權篡位添,真係勁冷血!
唔少人都喺佢Instagram留言大讚「『黑化』Terry好型」、「演技大爆發」、「睇唔慣呀」,其實唔只網友睇唔慣,連佢自己都話演唔慣,因為做咗傻仔咁多年,突然變奸都要一段時間適應,而佢仲多謝大小姐同「舅父KC」歐瑞偉嘅幫忙!網民都話好期待之後嘅劇情,有人就好掛住傻頭傻腦嘅Terry、有啲仲幻想大小姐聯合Max對付番Terry添,唔知Terry之後會點呢?