脫單？甄詠珊學識戀愛之道：有好消息會公布

歌手甄詠珊到電台宣傳新歌《難》，一身拍劇造型的她表示正拍《愛．回家之開心速遞》：「呢集講緊我要扮《城寨英雄》，所以就呢個造型，但我又有呢個電台節目，所以陣間再返去拍劇。」講到新歌，她表示：「講一段關係要包容，兩個人熱情過後，缺點就會開始浮面，要幾多愛先可以去包容對方，兩個人要學習相處，有時啲人會覺得兩個人係咪唔適合，其實我覺得佢哋係唔識點樣去磨合。」

她又表示新歌是自己心聲，曾是一個麻木去愛的人：「就算佢對同錯，如果同佢拍咗長時間都唔想同佢分手，係直情連自己嘅對同錯都睇唔到，我又試過喺街度同對方爭執，同埋如果佢唔聽電話，我係會打爆佢個電話，但依家就開始學習唔應該去麻木，一定要跳番出嚟，同埋鬧交時要提自己冷靜，雖然成三十幾歲先識好遲。」問到現時可有對象陪伴她學識這個智慧？之前一起去日本旅行那個男生？她即甜笑謂：「哈哈，有好消息會公布嘅。（依家了解緊？）係close嘅。」她又謂對方曾在日本工作，今次對方帶她去了一間平民無法光顧的素食餐廳，現時自己都有自學日文。