張敬軒收蠱惑iPhone決定報仇:我會...

20190412
東網電視
更多新聞短片
軒仔諗住向Fans大報復!
歌手張敬軒現身銅鑼灣,出席商場內的漫威大作《復仇者聯盟4》主題活動,自認是Marvel Fans的軒仔表示該系列每套電影都有追看,問到早前可有去搶首場電影戲飛?他得戚笑謂:「今次識人,唔使自己撲,之前有試過包細場睇。」
軒仔續指今次出席活動有雙重意義,因為他笑言要化身復仇者聯盟的其中一位成員去「復仇」Fans。更即場拿出日前收到的「蠱惑iPhone」(相關連結: https://bit.ly/2GjFGpP )訴苦:「專登拎埋實物出嚟,我食咗其中一粒朱古力,食落口有怪味,佢最衰嘅係佢有塊鋼板喺入面!(你當初收到電話好開心?)覺得佢好有腦,佢仲跟埋張收據,佢係喺內地買成萬蚊!下次我出碟一定會喺其中一啲碟放光酥餅,今次真係道高一尺、魔高一丈!但佢哋真係好有創意。(知唔知邊個?)真係唔知,佢係匿名,好有心思,同埋原來咁多人鍾意睇Artist畀人整蠱,呢個Post有成8萬幾個Like。(李司棋話你講錯咗佢個腔調。)係呀,所以佢罰我下次開騷要唱『笑聲笑聲滿載溫馨⋯』(無綫劇集《真情》主題曲)。」
一向錫Fans的他表示不主張Fans送貴重禮物,買正版碟已經有足夠的支持,問到是否學容祖兒話齋蠱惑歌手就有蠱惑的Fans?他笑住否認,並自稱是可愛歌手:「冤有頭、債有主,可能我成日整蠱啲Fans,趁佢哋冇力反抗就話佢哋肥,今次獲利回吐,之前種苦果太多,但我同Fans都係以整蠱為樂,係一個好好嘅關係。」可會想尋找「兇手」?軒仔笑話都好,並會賞「重酬」:「無論佢係喺香港、定內地,如果佢IG留言自首,我就會請佢睇呢套戲。(如果佢係內地Fans包車費?)旅費自付。」