親自幫KB紋身　祖兒眼濕濕：唔值得為我咁做

天后容祖兒（Joey）與老友關智斌（Kenny）早前飛往日本北海道旅行，專程到好友KB（Kevin Boy，李健宏）經營一間酒吧拍攝。提到Joey紀念入行20周年，將於8月舉行《PRETTY CRAZY演唱會》，一向玩盡瘋狂嘅KB更膽粗粗，邀請Joey親手將演唱會名字紋上身，Joey亦一口答應，配合演唱會主題，認真Crazy！

Joey自爆與KB相識15年，KB為紀念兩人嘅友誼，主動提出由好友親手紋上「PRETTY CRAZY JY 0318」，令Joey大為感動。身旁有專業紋身師講解，當Joey拎起器材上手，即時感到壓力甚大，仲感動到眼濕濕：「你真係傻佬嚟㗎！你唔值得為我咁做呀！」然後不忘搞笑，秒變臉話：「嚟啦！」紋到一半，Joey已經緊張出哂汗，仲話暈暈哋，Kenny即時拎紙巾幫佢抹汗。期間KB非常肉麻表示兩人15年嘅友誼，值得一個紋身，真係好有愛呀！當輪到眼光光心慌慌嘅Kenny，佢要紋當日日期「0318」 ，雖然得4個數字看似好簡單，但係Kenny隻手仲震過貓王！

最後，KB超搞笑同Joey講：「你唔好出年話掛咪呀，大佬！我真係煎巴你！」好多網民都留言大讚KB夠老友咁信任Joey，仲直指兩人已經唔係Pretty crazy，而係Super crazy！

網民有話兒

Saxxxx Lxxxx：好有愛的一份友情！

LXX：成件事真係super crazy！

Fxxx J：Joey紋到眼濕濕，太感動啦！

Bxxxxxx16：Joey真係好搞笑