為金像獎備戰　余香凝緊張買朱古力減壓

第38屆香港電影金像獎頒獎典禮將於本月十四日於尖沙咀文化中心舉行，現年25歲的余香凝（Jennifer）今年共有三項入圍，當中包括「最佳女主角」、「最佳女配角」以及「最佳原創電影歌曲」，戰期愈臨近，身兼當晚表演嘉賓嘅Jennifer就愈嚟愈忙碌，當然包括揀戰衣同首飾。

日前，就拍到佢去珠寶店揀首飾，第一次入圍影后，行頭當然要有番咁上下，珠寶店特別派出多位店員拿出近千萬鑽飾，讓Jennifer任揀，她亦相當有眼光「唔閃唔揀」，全部都係一啲閃爆亮眼鑽飾，6卡紅寶石、鴿子蛋鑽石項鏈等，其中佢仲睇中一個過百萬嘅鑽石后冠，店員為佢戴上時，十足十公主加冕一樣！揀完鑽飾之後，Jennifer同經理人行下商場，唔知係咪對獎項有壓力，當經過一間朱古力店嘅時候，就好似磁石咁「攝」咗過去，左挑右選，明顯想以朱古力「抗壓」，最終滿載而歸！

事後，Jennifer接受訪問亦承認最近壓力好大，但並非來自獎項，而係因為表演唱歌，Jennifer表示：「我好少唱live，所以好緊張，呢排成日發噩夢，會夢見演出嘅時候個咪失靈又或者唱唔出咁，真係好驚，但我會盡力克服，希望當晚順利度過！（有冇諗拎獎？）完全冇，所以呢方面反而冇乜壓力。」