《愛.回家》六大人氣CP組合 邊對啱你心水

20190413
東網電視
更多新聞短片
咁多對CP組合,你最鍾意邊對呢?
無綫劇集《愛.回家之開心速遞》星期一至五陪住大家食飯,劇中有唔少CP情侶檔大受歡迎,大家唔好以為只得情侶受歡迎,充滿「He He味」嘅男男組合,同樣都人氣爆燈!依家就同大家細數以下幾對CP情侶檔,睇吓邊對啱你哋心水!
大小姐 送水輝
「大小姐」林淑敏同「送水輝」許家傑呢對情侶經歷幾多風浪,終於可以一齊!雖然要玩地下情唔可以公開,但佢兩個喺愛巢「覓雪琴室」入面睇吓電視、玩吓煮飯仔,一樣都咁有愛!但係可惜依家冇啦啦彈出「商良」黎振燁被安排同「大小姐」政治拍拖,搞到同「送水輝」呢段戀情有危機,但好在「送水輝」成功儲到錢開酒吧同「大小姐」拉近距離,暫時可以保住戀情!
熊若水 龔燁
拖住成年幾嘅「龔水戀」,終於喺近期修成正果,上演世紀一吻,完到一班粉絲嘅願望!平時喺職場上為自己多過為人嘅「龔燁」張景淳面對「熊若水」呂慧儀嗰時,成個廿四孝男人咁,又做外賣仔送早餐,又不時心痛女友被「大小姐」鬧,雖然開頭要玩地下情,但最終喺誤打誤撞之下,順勢公開戀情,人人都知「龔水」拍拖!
金城安 譚育英
「金城安」周嘉洛雖然係一個廢青,但都追到個條件好嘅女朋友「譚育英」林凱恩,「譚育英」讀書又叻,人又靚,但仍然對住「金城安」一條心,平時又會上「金城安」屋企同「熊家」嘅人相處,真係廿四孝好女友!
金城安 譚道德
「金城安」周嘉洛同「譚育英」林凱恩拍拖,咁點解又會同佢爸爸「譚道德」陳榮峻成為CP情侶檔呢?事緣係有次「譚道德」想改造「金城安」,叫佢嚟佢屋企參加兩日一夜嘅訓練營,點知「金城安」開直播時,「譚道德」唔小心冇着衫現身,再加上「金城安」喺「譚道德」嘅學校教壞學生,搞到「譚道德」失去教育界最高榮譽「春風化雨獎」,令到「譚道德」每次見到「金城安」都好激動,結下不解之緣。
池子孝 George
呢對組合目前為止喺《愛》劇真係最「HeHe味濃」嘅一對,事緣因為「池子孝」阮政峰要惡補補習去考DSE,但就畀「熊心如」蘇韻姿誤會佢同「George」張明偉係一對。最新一集,講因為DSE逼近,「George」幫「池子孝」進行特訓,搞到「池子孝」大壓力到要上天台抖氣,但「George」以為佢自殺,即刻上天台攬住佢,令大家再次誤會呢對「小情侶」,網友睇完都話勁搞笑!
熊尚善 潮偉
「熊尚善」滕麗名同「潮偉」袁文傑呢對已經達老夫老妻級數,兩位相處方法成個老公老婆咁,其中一集「潮偉」被o靚模追求,開頭「熊尚善」危機意識好低,完全冇意欲打扮,最後「熊尚善」諗諗下唔對路,扮靚還擊,令「潮偉」由心笑出嚟,因為有人緊張自己。