讚定踩？！張彥博指栢天男似足Old Dog

藝人張彥博（阿博）、栢天男（Adam）、黃百鳴、網絡紅人熊仔頭出席動畫電影見面會，四人在台上跟狗狗大玩遊戲。阿博與Adam首次合作為動畫配音，在澳洲土生土長的Adam坦言難度很高：「錄完要再錄導演先收貨，佢知道我能力，所以就慢慢push我。咬字方面係其中之一，語調好難扮一隻年長嘅狗。今次真係衝破自己嘅限制！」但阿博則大讚對方演繹得栩栩如生：「佢本身同我講話好多中文字都唔識講，但聽到時好有old dog嘅味道！最正係聽完佢把聲先知佢係咁靚仔，成個金城武咁！」

阿博更為戲爛聲：「我配咗三日，由朝早九點配到夜晚十二點，一句對白NG咗好多次，最難係扮狗嘅抖氣聲，錄到口乾爛晒聲，去到後面把聲越嚟越rock！」他與羅蘭繼《一屋老友記》再度合作，他笑說：「今次再合作係做佢隻狗，非常之榮幸！」兩人表示為免口乾，都有帶潤喉食品入錄音室，正在減肥的Adam還因此破戒食甜食。