谷《愛回家》去到盡！呂慧儀紫色泳衣益街坊

藝人呂慧儀、湯盈盈、單立文、劉丹、蘇韻姿、林淑敏、張景淳和周家洛到鑽石山出席處境劇《愛．回家之開心速遞》宣傳活動。早前呂慧儀及蘇韻姿在劇中穿上超保守泳衣，網民大嗌唔收貨，呂慧儀表示下星期尚有驚喜：「我會着紫色泳衣，比較性感，已經post咗一張相上網預告一吓。（反應好會唔會再性感啲？）我哋係八點檔！重點唔喺呢度！」

講到早前她與張景淳咀嘴，她表示事前很擔心被4歲半兒子「蟹籽」質問：「我一收到分場即刻問監製係咪一定要咀？我部署好唔畀個仔睇，但佢過咗兩星期都睇到，佢打畀我問我係咪唔鍾意佢喇？我驚到標晒冷汗，問婆婆做咩畀佢睇，我要返屋企好好輔導佢，解釋拍戲係假架！依家着泳衣都要問准佢！」問到復活節節目，她透露囝囝要準備面試，因此要減少玩樂，花多一些時間學東西增值。