遲睇怕劇透？《復4》內地午夜場預售破紀錄

莫非真係「早睇早享受，遲睇怕劇透」？漫威（Marvel）十周年終極晒冷作《復仇者聯盟4：終局之戰》（Avengers：Endgame）成為全城焦點，內地與港台早過北美開畫，三地近日預售同掀撲飛潮，內地更見浮誇情況，午夜場預售票房日前已達7,586萬港元，打破《狂野時速8》（The Fast and the Furious）於當地保持的7,334萬港元最高紀錄，最早場就正正係開畫日24日凌晨12點，雖然睇完已經凌晨3點，不過場次一開賣亦都爆晒，不少網民於社交網大呻難搶飛，更有人表示難搞過春運！