林文偉設靈　顧冠忠麥子雲送最後一程

於七、八十年代由影壇武師進身為演員的資深電影人林文偉，原名林文渠，早前因病離世，今天在世界殯儀館設靈，明天出殯，遺體將送往鑽石山火化。靈堂上，林文偉的家屬都表現低調，未有接受採訪，至傍晚五時半，林生前好友顧冠忠和麥子雲到場致祭，顧冠忠受訪稱：「當年一齊入行﹑一齊玩﹑一齊拍戲，之後大家都好耐冇見，後來透過一個內地導演，得知佢喺馬來亞拍戲，近年先開始有聯絡，都知佢身體唔好，本來想約出嚟見吓面，可惜未見到面，佢就過咗身！」

至於麥子雲，他表示自己入行已40年，跟林文偉同樣做特技人工作：「我係邵氏訓練班出身，跟傅聲﹑米雪同期，有拍戲有做特技人，上年年中見過佢（林文偉），嗰時身體已經唔好，當年佢做特技火人，個肺吸到石棉，變咗纖維肺，後期仲得番一成肺功能，舊年見佢，仲要用氧氣幫助呼吸！」