Bookmark慢慢睇！一文睇盡21部漫威超英片故事
20190417
東網電視
更多新聞短片
《復仇者聯盟4：終局之戰》就快上映，睇唔切前作可以Save定呢篇溫書喇！
漫威話題作《復仇者聯盟4：終局之戰》即將上映，無論有無睇過之前21集相關嘅超英片，如果想重溫咁多套戲大約講咩，但又無時間翻煲，東網就整合咗電影時間線，按時序盡量簡單介紹，方便大家入場前溫書，話晒21部，篇文係長啲，不過可以Bookmark儲起慢慢睇！
前提：咁多部電影唔單止關於多位超英登場，仲收埋大奸角「魁隆」想要嘅6粒「無限聖石」：空間寶石、心靈寶石、靈魂寶石、力量寶石、時間寶石同現實寶石
1.《美國隊長：復仇者先鋒》：40年代一名兵仔參加軍方秘密實驗被改造成「美國隊長」，對付嘅恐怖組織「Hydra」掠奪咗一粒能力超強嘅「宇宙魔方」，當中原來正正有空間寶石
2.《Marvel 隊長》：「神盾局」係專處理地球各種奇事嘅特殊部隊，特工Nick Fury於90年代首次接觸外星生物同遇見有超強能力嘅「Marvel隊長」，二人對敵時發現失落地球嘅「宇宙魔方」，後由「神盾局」保管
3.《新變形俠醫》：2005年，美國軍方重推「超級士兵重生計劃」，科學家Bruce Banner參與一連串實驗，意外令身體構造劇變，情緒不穩即變綠色巨大怪物－內心善良但破壞力強嘅「變形俠醫」
4.《鐵甲奇俠》：2008年，製造高科技武器致富嘅億萬富豪Tony Stark遭武裝份子綁架，心臟受損嘅佢暗中製造微型反應爐保命，研發鐵甲逃生成功後專心鑽研戰甲，化身「鐵甲奇俠」保衛地球
5.《鐵甲奇俠2》：「鐵甲奇俠」2011年被俄羅斯瘋狂武器發明家狙擊，「神盾局」女特工「黑寡婦」和「戰爭機器」首度登場，成為其戰友
6.《雷神奇俠》：2011年，銀河系神族「聖域界」之王放逐狂妄大仔「雷神」去地球，天神變凡人嘅佢要努力恢復拎起「雷神」之槌嘅資格，「神盾局」特工「鷹眼」一度阻止佢拎槌，同時間佢細佬「洛基」乘勢想奪王位，最終被「雷神」阻止
7.《復仇者聯盟》：2012年，「洛基」投靠「魁隆」以為可以一統「聖域界」，由對方手上處獲得藏有「心靈寶石」嘅權杖，同時偷取到「宇宙魔方」，製造蟲洞帶領外星大軍侵略紐約，「鐵甲奇俠」、「美國隊長」、「雷神」、「黑寡婦」、「鷹眼」與「變形俠醫」第一次集結成「復仇者聯盟」合力對敵，奪回「宇宙魔方」，交由「聖域界」保管
8.《鐵甲奇俠3》：2012年紐約之戰後，「鐵甲奇俠」留有心魔怕身邊人受害，同時被早年得罪嘅科學家對付，女友更被注入重寫人體操作系統嘅「激念」，結尾重整身心抗敵，一度引爆所有戰甲，疑想為女友收山
9.《雷神奇俠 2：黑暗世界》：2013年，「雷神」致力重整宇宙九界，但古老種族「黑暗精靈」想奪取神秘能源「乙太」作惡，原來當中含有「現實寶石」，「雷神」遂與難分忠奸嘅「洛基」聯手抗敵，「雷神」最後將「現實寶石」轉交給「收藏者」保管
10.《美國隊長2》：2014年，「美國隊長」與「黑寡婦」與新盟友「獵鷹」聯手發現「Hydra」重生並將「神盾局」黑化，昔日戰友變成「寒冬戰士」成為忘記友情既敵人，「美國隊長」決心搵出真相
11.《銀河守護隊》：2014年，宇宙中一個爛仔「星爵」偷去內藏「力量寶石」嘅神秘球體而被追殺，輾轉與幾個「魁隆」養女「嘉魔娜」、「達拉斯」、「浣熊火箭」同「樹人」拉雜成軍組「銀河守護隊」，力抗魁隆及其手下
12.《銀河守護隊 2》：2014年，「星爵」繼續率領「銀河守護隊」，偶爾遇上外號「星爵」之父，揭露「星爵」擁有古老神秘血統遺傳嘅力量，佢為宇宙和平而父子對決，同時為「銀河守護隊」再添成員
13.《復仇者聯盟 2：奧創紀元》：2015年，為對付人工智能機械人惡魔「奧創」嘅毀滅人類計劃，「鐵甲奇俠」、「美國隊長」、「雷神」、「變形俠醫」、「黑寡婦」與「鷹眼」再度集結，「紅女巫」、「快銀」以及由「心靈寶石」與「鐵甲奇俠」人工智能助手合組而成嘅「幻視」登場。
14.《蟻俠》：2015年，智慧型職業騙徒Scott Lang意外獲得能縮小身體同時引爆強大超能力嘅「蟻俠」戰衣，協助前「蟻俠」皮漢克博士阻止技術落入敵人手中，意外跌入「量子區域」再重返人間，皮漢克博士透露老婆為初代「黃蜂女」，早年作戰時犧牲自己跌入「量子區域」
15.《美國隊長 3：英雄內戰》：2016年，「鐵甲奇俠」同「美國隊長」因「復仇者聯盟」應否受執法部門監管，以及前者與「寒冬戰士」嘅往事而決裂，分裂成兩大陣營，「黑豹」同「蜘蛛俠」首度登場加盟漫威電影宇宙
16.《蜘蛛俠：強勢回歸》：2016年英雄內戰後，「蜘蛛俠」為求加入「復仇者聯盟」而四出打擊罪案，力戰罪犯「禿鷹」後獲「鐵甲奇俠」邀請加盟，卻突然變心，決定專心學業做幫助街坊嘅小英雄
17.《奇異博士》：2016年，神經外科醫生Stephen Strange因車禍令雙手嚴重受創，前往秘境求醫時獲古一大師指導，被激發潛藏能力，能夠操控時間穿梭空間，最後以蘊藏「時間寶石」的神器「阿迦莫多之眼」拯救世界
18.《黑豹》：2017年，隱世高科技神秘帝國「瓦干達」嘅國王兼初代「黑豹」因恐襲離世，兒子趕回繼位，向國民力證能力，力敵奪位者
19.《雷神奇俠 3：諸神黃昏》：2017年，「雷神」家姐原來係「死亡女神」，佢回歸「聖域界」想發動巨大戰爭，摧毀「雷神」之鎚，他與「變形俠醫」、「洛基」聯同「女武神」合力對付家姐，「洛基」同集偷去藏著「空間寶石」嘅「宇宙魔方」
20.《復仇者聯盟 3：無限之戰》：2018年，眾超英終於發現所有事源於「魁隆」想收集6粒「無限聖石」放入手套，再施法毀滅宇宙半數人口，「復仇者聯盟」集結對敵，但「魁隆」仍集齊聖石成功實行計劃，多名復仇者於魁隆彈指間化灰，「鷹眼」與「蟻俠」於此集並未現身，片尾片段有「神盾局」前局長Nick Fury化灰前向「Marvel隊長」求救，預告女方於《復4》出場
21.《蟻俠 2：黃蜂女現身》：2018年，「蟻俠」與新隊友「黃蜂女」首度拍檔，攜手對付奸角「鬼魅」，並前往「量子領域」拯救女方媽媽，即首代「黃蜂女」
至於《復4》將會講餘下嘅「復仇者」終極集結，視死如歸力圖逆轉「魁隆」造成嘅局面，重整宇宙秩序