黃庭鋒體育老師變小生　棄高薪厚職好掙扎

無綫上位男神黃庭鋒早前憑劇集《救妻同學會》，表現亮眼，因而人氣急升，庭鋒話呢部劇係佢人生最多戲份嘅劇集：「當時一睇到劇本都覺得幾難演，因為呢個角色都幾充滿矛盾。（拍嗰陣辛唔辛苦？）拍咗兩個月時間，真係好快完咗，又同一班差唔多年紀嘅演員一齊拍，真係好開心。」

堅持讀埋碩士

黃庭鋒曾經喺國際學校做體育老師，早前仲喺中文大學修讀體育文學碩士課程，當時半工讀嘅真係咪話唔辛苦，究竟有咩動力令佢可以堅持落去？他說：「其實呢個學位係入行前已經開始讀緊，當時邊教書邊讀。但入行之後，中間我其實有幾次都想放棄唔讀，因為真係好辛苦，但我父母好支持我，叫我一定要堅持，話讀完呢個係一生，所以呢兩年有時要做嘢上唔到堂，最後原本兩年課程，要延長到兩年半先可以完成到。」

陳芷菁介紹入行

當初黃庭鋒要放棄高薪厚職，成為全職藝人，佢話當時內心都有掙扎過：「因為要有零開始，但其實我內心亦好鍾意做呢行，咁啱我其中一個學生家長就係陳芷菁，佢個女畢業嗰日，同佢傾開佢知我有做開兼職做主持，就介紹我入TVB。」突然放棄穩定收入，佢話幸好有積蓄支持：「初初都畀到家用，之後都OK嘅。（停咗畀幾耐家用？）都係斷斷續續咁啦！」

最愛開朗獨立少女

講到感情生活，黃庭鋒話已經Dry咗一年，話現時想努力工作：「對上個段感情，係因為工作性質問題少咗溝通而分手。（鍾意咩類型？）開朗，好有耐性同有少少獨立。」

場地：南瀛水產／Barry＠relaxdearhk

髮型：Yan Kwok＠hair

化妝：Jennifer Chan@Annie G. chan