非超英迷想知《復4》點解咁Hit?請內進!

20190418
東網電視
更多新聞短片
《復仇者聯盟4:終局之戰》成為熱話,人人都講,到底咁多部電影講咩㗎?
漫威終極晒冷作《復仇者聯盟4:終局之戰》掀起全城撲飛熱,少睇超英片嘅觀眾可能真係唔知點解咁Hit,查實成個系列由2008年就開始發展,漫威先後推出咗21部電影,每個獨立故事其實於同一電影宇宙發生,當中有勁多細節位同片尾片段相互串連,即係漫威用上10年時間,以21部電影去鋪出「終極故事」-就係大奸角「魁隆」一直想搵齊6粒「無限聖石」放入手套,施法消滅宇宙一半人口,一班超英點抵抗?粉絲追咗10年,去到上年先見到「魁隆」真身,今個月嘅《復4》就真係會睇到「魁隆」嘅下場喇,點會唔心急撲飛睇結局?
而冇睇過之前咁多集,但又想知發生咩事,唔使死撐煲番晒嘅,《復4》導演都話,最重要係睇番兩套戲,一套係《美國隊長3:英雄內戰》,講呢班超英點解決裂,一套就係上集《復仇者聯盟3:無限之戰》,直接講「魁隆」登場同埋佢造成嘅破壞,咁大致上就可以掌握初步資訊入場睇《復4》喇!
如果真係想知之前21部超英片大約講咩,而又冇時間翻煲,東網亦整合咗電影時間軸介紹故事,不妨Click入呢度( http://bit.ly/2Iv41LN )睇睇!