拍劇爆肚　林雪籲後生仔女少講粗口

由林雪、鄧健泓及王宗堯主演的原創劇《向西聞記》單元《碌架床》，描述一家六口在兩房的三百呎公屋困獸鬥。其中一幕，講述大佬鄧健泓及細佬王宗堯為爭房炒大鑊，老竇林雪睇到眼火爆，爆粗狂剷：「邊X個生個孫畀我，間屋就畀邊個！」兩兄弟一聽完即刻各自捉住老婆石詠莉及蔡明思（Jessica@SuperGirls）入房進行造人大計。餘怒未消的林雪就繼續爆粗，但又反對兩個仔「白日行動」：「日頭唔好做呀，日頭中嗰啲，生出嚟嗰啲黑色㗎！你兩個咁白淨，你問吓你老母吖，我哋晚晚…嘻嘻…」宣傳片長約兩分鐘，日前曝光一日hit rate已逾50萬，網民群情洶湧，狂讚林雪講粗口好好笑，夠晒港式地道又喜感瀰漫，令網民笑到肚痛。

林雪的「黑白BB生仔論」原來是拍戲當日即場爆肚，因為林雪向來消化完角色再自然吐納，效果相當生活化，他說：「做戲就係做緊生活，我好少家嘈屋閉，但一家人點都有啲拗撬時候，就係因為係一家人，愛之深責之切嘛！」林雪的地道粗口會隨住劇集於本月30日隨NETFLIX走遍全球，雖則網民勁buy其爆粗，但林雪說：「我講粗口唔代表認同講粗口係一件好事，相反好想話畀後生仔女聽，唔好講咁多粗口，因為粗口有時會傷害人，不過粗口始終係我哋一種文化，希望大家當睇喜劇，睇吓笑吓就算。」