王子拍劇有特別福利　粉絲送餐車應援

台灣男星「王子」邱勝翊出身自偶像團體棒棒堂，向來深受粉絲愛戴，近日佢為新劇開工出外景進行拍攝，粉絲特意前來探班之餘，竟然仲安排咗餐車到場慰勞一班工作人員，貼心到令王子都受寵若驚！

王子喺社交網上載多張粉絲探班照，相中見餐車上不但有Pizza、各式小食同飲品，仲有埋雪糕機，王子更開心到立即品嘗。此外，仲有一架印有王子海報嘅貨Van嚟到應援，場面相當浩大。王子非常感激粉絲支持，留言：「謝謝你們的應援，替所有劇組的工作人員感謝你們。」