懶音馮盈盈被糾正 原來關條脷事

20190422
東網電視
更多新聞短片
馮盈盈啲懶音都真係幾嚴重。
藝人馮盈盈去年年尾上《美女廚房》時被詹瑞文取笑勁多懶音,引起網民熱議,今集無綫節目《#後生仔傾吓偈》,請嚟懶音特警羅山先生做嘉賓,閒談期間不斷糾正盈盈嘅發音,搞到佢講每句說話都好大壓力,更被封為「懶音界KOL」!
一開始,三位主持人盈盈、麥明詩(Louisa)同陸浩明(6號)挑戰讀出繞口令「我今日下午兩點五,喺香港北角恒生銀行大堂等你,然後去食牛排」,而Louisa同6號都表現得唔錯。萬眾期待,盈盈挑戰前即「戴定頭盔」話要做番自己:「我嘅懶音係馳名中外,上晒頭條,深入民心㗎!」盈盈果然不負眾望,懶音多到爆!羅山先生即指出佢嘅問題出咗喺條脷,眾人仲笑佢有條「蠱惑的脷」。其後盈盈講每一句說話都好小心,但「對白」、「黑糖」、「男朋友」等詞語都瘋狂畀羅山糾正,去到後面羅山已經冇佢咁好氣,盈盈亦陷入崩潰,令全場爆笑。
好多網民都搞笑話盈盈遇着懶音特警羅山,今集係佢有史以來主持得最辛苦嘅一集《#後生仔傾吓偈》,但亦有網民十分抵死,笑指羅山聽到盈盈超多懶音都好痛苦㗎!
網民有話兒
Vaxxxxx Lxx:兩個人都就快崩潰
Yxxxxx Cxxx:羅山係盈盈嘅死敵哈哈!
Marxx Fxxx:其實馮盈盈啲懶音真係幾難頂
Cxxx Tsxxx:盈盈好好笑