上完《流行經典》出新歌　蔡興麟好多計劃

歌手蔡興麟舉行新歌發布會，獲肥媽、阮兆祥、李樂詩等好友到場支持。他表示相隔廿多年，再在香港出廣東歌：「其實一直都計劃喺香港出廣東歌，咁啱舊年又上咗《流行經典50年》，其實舊年都有喺大陸出國語歌，依家就想喺香港出番廣東歌。」講到新歌叫《背囊》，他說：「個個喺背囊裝嘅嘢都唔一樣，好多人感覺入面裝咗好多過去，好重，我首歌就想帶畀人希望，唔好覺得過去係包袱。」講到轉了形象，是否配合新歌重新出發？他說：「都係，想畀人新鮮感，之前都未試過。」

他又透露之後有一連串計劃，例如10、11月會在港舉行慈善騷：「香港會係其中一站，上年喺北京做過，之後都會去上海其他地方。（香港喺邊度搞？）都搵咗幾個場，例如九展，但紅館就太難啦，又冇期，都想喺多啲地方開慈善騷。」他又謂打算出廣東碟，亦多謝今日來捧場的朋友，已多年不見。而其經理人陳寶儀就很感動蔡興麟新歌面世，多謝很多人的支持。