談安心偷食被轟身份尷尬 裕美反擊網民

2019年04月24日 13:16
東網電視
更多新聞短片
裕美「過來人」身份講安心偷食,但就被網民指佢身份尷尬!

藝人裕美當時未搞好離婚手續而同過黃子恆拍拖,引來千方所責!前日佢出席活動時,以「過來人」身份分享對許志安黃心穎偷食事件嘅睇法,當時佢話:「當然以我經驗係處理咗先,Timing適合先一齊,但坦白講好多時情到濃時,情緒上,好多時因為感覺而做咗啲唔啱Timing嘅事。」仲講番當日同前夫分開原因,係因為性格不合,而變得「有名無實」,但無奈分開係需要時間同手續。

點知此舉觸動網友神經,指佢身份尷尬,唔應該再喺呢件事上畀意見,咁就唔會得罪任何人,裕美即回網友,話因為記者問佢,佢必須回答,呢個係尊重,仲話自己係娛圈人,唔覺得身份尷尬,仲話從來唔需要博見報:「記者問我我必須答,這是尊重記者朋友。我講嘅係自己經歷,唔係人哋。我係娛樂圈人,身份有何尷尬?我係講冇人有資格批評人,咁叫抽水?除非你完全冇錯過,聖人一般。你有冇睇過我講咩?我講嘅正正係你嘅建議。我從來唔需要博上報啊,我啲嘢自然上報。工作順利會有人寫?你會唔會太天真?如果話冇資格講的話,你都算冇。因為你唔識扮識。」

雖然畀人炮轟,但亦有網友力撐裕美,指佢真性情,唔需要理人點講,而裕美亦好有心,逐一覆網友留言,覆到今朝凌晨5點先肯停。