《復仇者聯盟4》劇透慎入　粉絲數經典驚喜位

20190424
  • 東網電視
    更多新聞短片
    慎入呀！
    漫威終極晒冷作《復仇者聯盟4：終局之戰》（Avengers：Endgame）今日於中港台率先上映，如果你未睇套戲，睇到呢句好去番出主頁欣賞其他東網新聞喇！呢篇文章係專為已睇《復4》粉絲而設嘅，唔係唔畀你睇，係唔想劇透影響你觀映感受啫！咁已睇嘅粉絲呢，電影結局同所有人嘅命運都清楚啦，「你知我知單眼佬都知」就算，東網就同你盤點一下，今集多個粉絲應該冧爆嘅驚喜位！
    作為十周年集合21部前作大成嘅電影，《復4》送上好多同前作有關嘅驚喜，睇少眼或者唔好記性就可能Miss咗，你又睇到幾多？
    1.客串：「漫威之父」史丹利臨終前完成《復4》拍攝工作，22部漫威電影都有佢身影，佢今集做精靈司機，完美告別觀眾。而執導《美國隊長2》後成為漫威主要名導嘅祖羅素同安東尼羅素兩兄弟亦親身送驚喜，一向愛客串嘅前者繼續粉墨登場，於創傷分享會同「美國隊長」傾心事！
    2.芝士漢堡：「鐵甲奇俠」係漫威元老級嘅角色，今集不單有佢個人系列鐵三角—即係佢同「Happy」及「Pepper」現身，後者堅着盔甲落場外，佢生下嘅囡囡仲愛食芝士漢堡，被「Happy」爆似足老竇。於2008年《鐵甲奇俠》中，「鐵甲奇俠」逃生後第一件事就想食芝士漢堡，仲一連隊咗幾個。
    3.「九頭蛇」：「美國隊長」今集狂送懷舊驚喜位，於《美國隊長2》當中，佢喺電梯同被「九頭蛇」滲入嘅「神盾局」特工對手是為系列精彩場面之一，今集佢再次重現電梯困獸鬥，但已學精嘅佢只需憑對方組織暗語「Hail，Hydra」（九頭蛇萬歲）就解決問題唔使打！漫畫版「美國隊長」曾被寫成變節係「九頭蛇」成員，今次於戲中佢就玩自抽出位！
    4.「Peggy」：作為終極之作，電影仲有彌補遺憾位，「美國隊長」於第一集未能與女友「Peggy」完成共舞之約，今集終於憑時空穿梭去到自己變大隻嘅舊地見番對方，埋尾仲可以完成浪漫共舞場面，成為一大感動位。
    5.布達佩斯：「黒寡婦」同「鷹眼」於今集拍住上搵「靈魂寶石」，佢兩個坐太空船上太空時又再提起於「布達佩斯嗰次」！如果粉絲好記性，佢哋於《復仇者聯盟》紐約一戰時，「黑寡婦」打外星怪物時就同過「鷹眼」講：「呢個場面令人諗布達佩斯！」今集上太空時，佢哋又再提起呢場秘密之戰！
    6.經典金句：今集仲有出現多個主角於前作嘅金句，「美國隊長」時空穿越後自己打自己，早年嘅自己被打到瞓底時講咗句：「我可以打足成日！」佢即時回應：「我知！」呢句對白係佢個人系列集集都出現，辨識度勁高！至於「鐵甲奇俠」今集大戰時亦講咗佢於《鐵甲奇俠》講過嘅名句：「I'm Iron Man.」秒速喚起粉絲回憶！
    7.雷神重返聖域界：講到彌補遺憾，電影有「雷神」返到聖域界見番已故媽媽嘅一幕，因為殺唔死「魁隆」而放棄自我嘅佢獲媽媽點醒再發奮，同場仲有《雷神奇俠 2：黑暗世界》出現過嘅女友「Jane」同埋「洛基」，聖域界要角除咗「奧丁」都好齊人。
    8.「古一」：唔止多部個人系列嘅要角再次現身，就連僅出一部電影嘅《奇異博士》都有「古一」現真身！今集「變形俠醫」穿梭到早年想搵「奇異博士」拎「時間寶石」，查實當時粒石係由佢師傅「古一」保管，對方解釋「奇異博士」仲未出現，最後「古一」被打動交出寶石，要求對方保證會歸還以令時空回復原狀。
    9.雷神之錘：「雷神」今集穿梭時空去聖域界有拎番早年未被打爛嘅雷神之錘，末段大戰時佢甩咗手，「美國隊長」竟然拎得起仲救咗佢，「雷神」即時講咗句：「早就知你得㗎啦！」呢度就呼應番《復仇者聯盟 2：奧創紀元》，眾復仇者曾分別去試拎要有資格先拎到嘅雷神之錘，當時人人都唔得，只有「美國隊長」郁到少少。
    10.串星閃現：除咗一眾於前作出現過嘅要角現身，今集結尾仲有一個感人場面，眾人着黑衫出席已死要角嘅葬禮，當中一個「男孩」閃現，唔知粉絲認唔認到？佢就係《鐵甲奇俠3》當中，陪住「鐵甲奇俠」對抗驚恐症嘅小男童！
    11.侯活史達：今集不但有「雷神」見媽媽，仲有「鐵甲奇俠」回到過去時，見到佢爸爸侯活史達嘅一幕，對方仲同佢講老婆就生得（即係佢就出世喇！），已有一女嘅佢同爸爸真情對話，仲臨時借女友個姓，話自己叫「Howard Potts」。「鐵甲奇俠」於過往電影多次講到父子情嘅缺失，今集終於同老竇情深攬攬，場面動人！
    12.「Jarvis」：無錯！「幻視」已死，但今集都有佢把聲！當「鐵甲奇俠」同爸爸侯活史達分開時，接送後者既助手就叫「Jarvis」！粉絲應該記得「鐵甲奇俠」第一集個人工智能助手就叫「Jarvis」，似乎就係對爸爸助手嘅紀念，而今集就有於漫威劇集《Agent Carter》出演「Jarvis」嘅James D'Arcy驚喜現身，連結漫威電視與電影宇宙。
    13.美國隊長盾牌：「美國隊長」同「鐵甲奇俠」於《美國隊長3：英雄內戰》不和，前者仲放棄咗對方老竇侯活史達所造嘅盾牌，今集二人和好對敵，「鐵甲奇俠」親手送番盾牌畀佢，「美國隊長」用番《復仇者聯盟》出動嘅盾牌打最終之戰！
    14.核反應爐：「鐵甲奇俠」叫「東尼史達」，第一集《鐵甲奇俠》被劫時做咗個小型核反應爐於心口療傷同時為戰甲供電，逃生後「Pepper」就用個舊嘅核反應爐做咗份禮物界佢，寫上「Proof That Tony Stark Has a Heart」（證明東尼史達是個有心人），呢份禮物，事隔11年，今集亦再出現，由「Pepper」母女再送畀「東尼史達」，場面感人！