重現「翻版木村拓哉」　蔡興麟平時唔保養

活躍於90年代初的歌手蔡興麟去年重返香港樂壇，今日到電台宣傳新歌《背囊》，講到長髮分界新造型，加上一身白衣，重現廿多年前的「翻版木村拓哉」感覺，他笑說：「當年去日本發展，係佢哋覺得我似啫！其實以前好多時都係包裝，唔係我嚟，我平時唔姿整，都係戴帽唔梳頭，好多人問我點保養，我冇㗎！就算敷mask都可能一年一、兩次，因為拍嘢被迫要敷，我覺得平時掛住貪靚好煩。」

講到今次新歌以管弦樂crossover Band Sound，是他音樂旅程中一次新嘗試，對於作品概念，他說：「人生好似背囊咁，背負好多好重嘅嘢，大家多數覺得唔開心，但其實可以自己揀入面裝咩，我會揀希望同愛。」他又透露歌曲會作慈善捐予幫助導盲犬。