台北遇地震　林慧倩誤以為撞邪

藝人林慧倩（Giselle）完成慈善活動司儀工作後，日前趁假期陪家人到台北旅行，點知遇上當地6.1級地震，Giselle話當時一個人喺酒店休息，突然酒店張床大力搖動，起初以為係靈異現象：「見到掛住嘅衫大力晃動先意識到係地震，我第一時間拎電話衝出走廊，想搵酒店職員求救，酒店職員確認係地震，指示我逃生門位置，好在地震只係持續咗大約1分鐘。」

當時都有打畀喺街上嘅家人，可能受地震影響網絡，打咗三次電話先有人聽：「以前喺新西蘭遊學時都有遇過輕微火山地震，但今次喺台北遇上地震幅度真係好嚇人。因為家人長住外國，已經好多年冇試過全家去旅行，最後大家都平安無事返香港。」

P.S.4月18日台灣花蓮發生被喻為「超有感」地震！全台劇烈搖晃，最大震度為花蓮有7級，另宜蘭、桃園、新北及台北的震感亦有4級，台灣高鐵全線停駛，台北捷運亦停駛檢查，台鐵亦一度暫停。