全刪撐黃心穎甫!梁裕恆IG Follow人數暴升

20190426
東網電視
更多新聞短片
好明顯啦!
自從黃心穎許志安偷食事件爆出後,兩人成為全城圍插對象,唯獨落選港男梁裕恆(Flow)不停出甫,爆料天后老公講大話呃人話佢會離婚,力撐黃心穎「只係一個追求愛情嘅女仔」,佢仲拍片以陰謀論去拆解成件事,除咗話成件事係畀人設局之外,仲反問網民邊個先至係成件事嘅最大得益者?
雖然Flow不停發功,不過網民唔多Buy一面倒留言鬧佢多事同博出位,曾經講過唔會理會網民留言同埋要堅持己見,講出自己認為啱嘅事嘅Flow,突然刪除晒所有撐黃心穎嘅Post包括片、相同發文,唔少網民繼續喺佢嘅社交網留言鬧,話搞完一大輪刪甫擺明就係純粹抽水博出位,仲有人笑佢唔夠堅定,唔似工藤佑采由始至終都係同黃心穎開火,就算受盡指摘都冇退縮過。
其實Flow撐黃心穎嘅發文一出,唔少網民都話要Unfollow佢,不過實情係咪咁呢?睇番佢嘅IG原本有9,983位Follower,畀網民鬧咗咁多日之後,Follower人數不跌反升去到11,461,升幅超過一成,用番Flow嘅陰謀論嚟推斷,邊個至係得益者?