向郭子豪偷師練腹肌　馬貫東要變大隻仔

藝人馬貫東憑無綫處境劇《愛．回家心速遞》「博士」一角為人熟悉，近日忙完劇集《致所有愛過的人》嘅佢，趁住空檔時間孖住郭子豪去健身，裝備自己，他說：「其實平時都有做開，但近來發現自己練習冇乜進步空間，所以搵郭子豪同我練習，在加上想喺開第二套劇前，準備好啲，畀大家唔同嘅感覺。（想進步啲咩？）線條想好啲，同埋我從來冇腹肌，但依家要增加番啲肌肉先可以再減磅。」

另外，除咗做健身之後，佢又搵嚟《愛》劇「金城安」周嘉洛跑步，齊齊過健康人生：「因為跑步一個人都好悶，所以搵佢一齊跑。（會唔會叫多人跑，成立愛回家跑步隊，好似Crazy Runner咁？）Easy Runner就得，都可以諗吓，但我哋都唔係打算比賽，都係從運動健康出發為主。」