《鐵探》虐打蔣祖曼　楊潮凱：係另類嘅愛

藝人楊潮凱在劇集《鐵探》中飾演反派江正龍，角色狠辣、寸爆又不擇手段，對曾是臥底的「快活谷」梁競徽恨之入骨，更搶了對方的女人蔣祖曼，卻又不時對蔣祖曼拳打腳踢，睇到觀眾牙癢癢！

對於角色衰到爆，潮凱卻有一番解說：「大家可能覺得我個角色好衰，但對於佢嚟講係合理，因為梁競徽之前出賣我個大佬，我係真心鍾意蔣祖曼㗎！只係呈現方法令大家會覺得黐線，好似狗仔屙尿霸地盤咁，所以先會咁對佢，有時睇新聞都會見到有啲人點樣表達愛，都係另類啲，正龍呢個角色性格係好囂張，啱啱上位做好多壞事，但其實之後都冇點對蔣祖曼衰。（驚唔驚畀觀眾憎？）做到咁嘅話，即係成功咗啦！如果大家呢排喺街見到我可以走埋嚟話憎我，我反而開心呀！做演員就咩角色都要盡力演好佢，如果有人話因為好憎正龍而鍾意咗我，就最好喇！」